काठमाडौँ । उत्तर अमेरिकी छिमेकी मुलुक क्यानडाबाट आयात हुने करिब एक अर्ब अमेरिकी डलर बराबरका विभिन्न सामग्रीमाथि अमेरिकाले कडा प्रतिबन्धको घोषणा गरेको छ । हालै सार्वजनिक विवरणअनुसार प्रतिबन्धित वस्तुहरूको सूचीमा मादक पेय पदार्थ, दुग्धजन्य उत्पादन र मोटरसाइकललगायतका सामान परेका छन् ।
अमेरिका र क्यानडाबीच विगत केही समयदेखि चर्किएको व्यापारिक किचलोलाई यो नयाँ निर्णयले झनै जटिल मोड़मा पुर्याउने विश्लेषण गरिएको छ । राष्ट्रपति डोनाल्ड ट्रम्पको दोस्रो कार्यकाल सुरु भएसँगै सतहमा आएको दुई देशको व्यापार विवादलाई यस कदमले थप बल्झाएको छ ।
भौगोलिक र राजनीतिक रूपमा क्यानडा अमेरिकाको लामो समयदेखिको साझेदार मानिन्छ । यी दुई मुलुकबीच वार्षिक रूपमा करिब ८८० अर्ब अमेरिकी डलर बराबरको विशाल द्विपक्षीय व्यापार हुने गर्दछ । यस दृष्टिकोणबाट हेर्दा मंगलबारदेखि लागू भएको नयाँ प्रतिबन्ध कुल व्यापार परिमाणको तुलनामा निकै सानो अंश हो ।
व्यापार मामिलाका अधिवक्ता प्याट्रिक चाइल्ड्रेसले अमेरिकी प्रतिबन्धले दुई देशबीचको दूरी घटाउनुको साटो सम्बन्धलाई अझ तिक्त बनाउने धारणा राखेका छन् ।
यी दुई देशबीचको पछिल्लो व्यापारिक तनाव गत गर्मीयामदेखि उत्कर्षमा पुगेको थियो । त्यसबेला राष्ट्रपति ट्रम्पले क्यानडाली सामानमा ५० प्रतिशतसम्म शुल्क तोकेका थिए । क्यानडाले अमेरिकी दुग्ध, सवारी र मदिरा उत्पादकहरूलाई विभेद गरेको आरोप ट्रम्प प्रशासनले लगाउँदै आएको छ । सोही कदमको प्रतिरोध गर्दै क्यानडाले पनि अमेरिकी उत्पादनमा उच्च शुल्क लगाएपछि ट्रम्प प्रशासन थप आक्रामक बनेको हो ।
विश्लेषकहरूका अनुसार यो प्रतिबन्धको आर्थिक प्रभाव तत्कालका लागि सीमित रहनेछ । चाइल्ड्रेसका अनुसार सूचीकृत सामानमा पहिले नै ५० प्रतिशत कर लागिसकेकाले अमेरिकातर्फको निर्यात व्यापार पहिले नै सुस्त भइसकेको थियो । अमेरिकी थिंकट्यांकका ज्याकब जेन्सेनका अनुसार प्रतिबन्धित ९६ करोड ७० लाख डलर बराबरको सामानमा ८७ प्रतिशत हिस्सा मदिराको छ । क्यानडाका केही प्रान्तले अमेरिकी मदिरा बिक्रीमा रोक लगाएपछि त्यसैको बदलास्वरूप ट्रम्पले मदिरालाई निशाना बनाएका हुन् ।
लामो समयदेखि क्यानडाले आफ्नो दुग्ध क्षेत्रलाई जोगाउन विदेशी उत्पादनमा उच्च कर लगाउने नीति अपनाउँदै आएको छ, जुन अमेरिकाका लागि असन्तोषको विषय रहँदै आएको छ ।
ट्रम्पले भने क्यानडा अन्ततः वार्तामा आउन बाध्य हुने दाबी गरेका छन् । यता क्यानडाका प्रधानमन्त्री मार्क कार्नीले भने ट्रम्पको भनाइमा सीधा टिप्पणी गर्न अस्वीकार गर्दै सार्वभौमिकताको सम्मान हुने गरी वार्तामा बस्न क्यानडा सधैँ तयार रहेको स्पष्ट पारेका छन् ।
अधिवक्ता चाइल्ड्रेसका अनुसार अहिले दुवै तर्फबाट चालिएका कदमहरूले तत्कालै वार्ताको वातावरण बनाउने सम्भावना कमै छ । त्यसैले यो व्यापारिक गतिरोध केही हप्ता नभई महिनौँसम्म लम्बिन सक्ने देखिन्छ ।
