बुटवल । सिद्धार्थ राजमार्गको जोखिमयुक्त सिद्धबाबा खण्डमा गुडिरहेको गाडीमाथि पहिरो खस्दा दुई यात्रु चोटपटक लागेर घाइते भएका छन् ।
पाल्पाबाट बुटवलतर्फ आउँदै गरेको कारलाई तिनाउ गाउँपालिका–३ स्थित माथिल्लो सिद्धबाबा मन्दिर नजिकै सडक माथिबाट आएको ढुंगाले लागेको थियो । साँझ करिब साढे ६ बजे भएको उक्त दुर्घटनामा परि गाडीमा पूर्ण रूपमा क्षति पुगेको छ ।
सवारीमा चालकसहित तीन जना सवार रहेकोमा चालक भने सुरक्षित रहेका छन् । दुर्घटना लगत्तै उद्धार गरि घाइतेहरूलाई उपचारका लागि बुटवल पठाइएको छ । घाइते हुनेहरूमा बुटवल–७ दिपनगरकी ३७ वर्षीया जुलन र जेसिज चोककी ६२ वर्षीया राधिका ढकाल रहेका छन् । चिकित्सकका अनुसार उनीहरूको अवस्था मध्यम छ ।
कार चलाइरहेका रुपन्देही शुद्धोधनका ३६ वर्षीय राजकुमार लोधलाई भने कुनै चोट लागेको छैन । सिद्धबाबा क्षेत्रमा निरन्तर ढुंगा खस्ने खतरा रहेकाले उक्त सडकखण्ड भई यात्रा गर्दा विशेष होसियारी अपनाउन इलाका प्रहरी कार्यालयले अनुरोध गरेको छ ।
