काठमाडौँ । जापानको आइची-नागोयामा सञ्चालन भइरहेको एसियाली खेलकुदमा नेपालको महिला कबड्डी टोलीले उत्कृष्ट प्रदर्शन गर्दै प्रतियोगितामा सुखद श्रीगणेश गरेको छ ।
मंगलबार बिहान भएको समूह ‘बी’ को पहिलो भिडन्तमा नेपाली महिला टोलीले थाइल्याण्डमाथि ४६-४३ को रोमाञ्चक जित दर्ता गर्यो । थाइल्याण्डलाई पन्छाउँदै हासिल गरेको यो जितसँगै नेपालले आफ्नो समूहमा महत्वपूर्ण ३ अंक जोड्न सफल भएको छ । तालिका अनुसार नेपाली टोलीले आफ्नो दोस्रो खेलमा बुधबार चाइनिज ताइपेइको सामना गर्नेछ भने बिहीबार श्रीलंकासँग प्रतिस्पर्धा गर्नेछ ।
यसपटक एसियाडमा प्रतिस्पर्धा गरिरहेको टोलीको कप्तानी मनमती विष्टले सम्हालेकी छन् । टोलीका अन्य सदस्यहरूमा नानुमाया पराजुली, मनिषा जोशी, मेनुका कुमारी राजबंशी, जयन्ति बडु, विनिता पण्डित क्षेत्री, आसमा यादव, मिना नेपाली, रबिना चौधरी, सिर्जना कुमारी थारु, खिममाया खत्री र गङ्गा घिमिरे रहेका छन् ।
महिला टोलीले सफलता हात पारिरहँदा पुरुष कबड्डीतर्फ भने नेपालले लगातार दोस्रो हार व्यहोरेको छ । मंगलबारै सम्पन्न दोस्रो खेलमा नेपाली पुरुष टोली पाकिस्तानसँग ५८-४३ को फराकिलो अन्तरले पछि पर्यो ।
यसअघि भएको पहिलो खेलमा पनि नेपाल थाइल्याण्डसँग ५९-४८ ले पराजित भएको थियो । अब पुनरागमनको खोजीमा रहेको पुरुष टोलीले बुधबार चाइनिज ताइपेइ र बिहीबार मलेसियाविरुद्ध मैदान उत्रिनेछ ।
