काठमाडौँ । पृथ्वी राजमार्गअन्तर्गत धादिङको कृष्णभीरमा नयाँ बाटो निर्माण गरी दुईतर्फी यातायात सञ्चालनमा ल्याइएको प्रति उज्यालो नेपाल पार्टीका अध्यक्ष कुलमान घिसिङले खुसी व्यक्त गरेका छन् ।
भोटेकोशी हुँदै त्रिशूली नदीमा आएको बाढीले सडक कटान गरेपछि कृष्णभीर खण्डमा सवारी आवागमन ठप्प बनेको थियो । सडक अवरुद्ध हुँदा आम सर्वसाधारणको यात्राका साथै दैनिक उपभोग्य सामग्रीको ढुवानीमा समेत गम्भीर असर परेको थियो ।
घिसिङले कृष्णभीर क्षेत्रको भौगोलिक तथा भूगर्भीय जोखिम उच्च रहेकाले यसको दीर्घकालीन र दिगो समाधान खोज्न आग्रह गरेका छन् । विज्ञहरूबाट विस्तृत भौगर्भिक अध्ययन गराएर मात्र सुरक्षित सडक संरचना बनाउनुपर्ने उनको जोड छ ।
साथै, भविष्यमा हुन सक्ने सम्भावित विपद्लाई ध्यानमा राख्दै तत्काल वैकल्पिक सडकको पहिचान र निर्माण कार्यलाई प्राथमिकता दिनुपर्ने उनले बताएका छन् । अवरुद्ध सडक छोटो समयमै सञ्चालनमा ल्याउन अहोरात्र खटिने भौतिक पूर्वाधार मन्त्रालय, सडक विभाग, नौबिसे–मुग्लिङ सडक आयोजना, सुरक्षाकर्मी, प्राविधिक, निर्माण व्यवसायी र स्थानीयवासीलाई घिसिङले धन्यवाद दिएका छन् ।
यसैबीच, उनले बट्टार–वेत्रावती हुँदै धुन्चे–स्याफ्रुबेँसी सडकखण्ड पनि यथाशीघ्र सञ्चालनमा ल्याउन सम्बन्धित निकायको ध्यान खिचेका छन् ।
