काठमाडौँ । चलचित्र विकास बोर्डले हालै प्रदर्शनरत नेपाली चलचित्रहरूको नयाँ बक्स अफिस विवरण सार्वजनिक गरेको छ। बोर्डका अनुसार भदौ २१ गते आइतबारसम्मको तथ्याङ्कमा साउन १ गतेबाट हलमा लागेको चलचित्र ‘गौथली’ले व्यापारमा आफ्नो एकछत्र दबदबा कायमै राखेको देखिन्छ ।
सार्वजनिक विवरण अनुसार ‘गौथली’ले अहिलेसम्म २५ करोड ८६ लाख २८ हजार रुपैयाँको ग्रस कलेक्सन गरिसकेको छ। यस अवधिसम्ममा फिल्मका ९ लाख ३० हजार ७४४ थान टिकट बिक्री भइसकेका छन् ।
अर्कोतर्फ, भदौ १२ गतेदेखि प्रदर्शनमा आएको नयाँ चलचित्र ‘पार्वती’ले पनि सुरुवाती दिनमै उत्साहजनक व्यापार गर्न सफल भएको छ। फिल्मले अहिलेसम्म ५४ हजार ७३५ टिकट बिक्री गर्दै १ करोड ५८ लाख ८४ हजार रुपैयाँ संकलन गरिसकेको छ ।
यस्तै, भदौ ५ गतेबाट दर्शकमाझ आएको प्रियंका कार्की अभिनित चलचित्र ‘मास्टर्नी’को व्यापार भने सुस्त देखिएको छ । हलहरूमा खासै प्रभाव जमाउन नसकेको यस चलचित्रले हालसम्म १२ हजार १९७ टिकट बिक्री गर्दै ४० लाख १५ हजार रुपैयाँ मात्र कमाएको छ ।
त्यस्तै, साउन २२ गतेदेखि हलमा प्रदर्शन भइरहेको चलचित्र ‘हली’को व्यापार पनि कमजोर रहेको छ । यस अवधिमा ८ हजार ५२५ टिकट बिक्री गर्दै फिल्मले २३ लाख ३२ हजार रुपैयाँ बराबरको मात्र कारोबार गरेको छ ।
