काठमाडौँ । मुलुकमा परेको प्राकृतिक विपद् र शोकको घडीलाई मध्यनजर गर्दै सरकारले २३औँ निजामती सेवा दिवसका अवसरमा तय गरिएका सम्पूर्ण कार्यक्रमहरू स्थगित गरेको छ ।
भूमि व्यवस्था, सहकारी, संघीय मामिला तथा सामान्य प्रशासन मन्त्रालयका अनुसार निजामती सेवा दिवस मूल समारोह समितिको बैठकले औपचारिक समारोह नगर्ने निर्णय लिएको हो ।
रसुवागढी नजिकै नेपाल–चीन सीमाक्षेत्रमा आएको विनाशकारी बाढीपछि सिर्जित परिस्थिति, खोजी तथा उद्धारमा राष्ट्रसेवक र सुरक्षाकर्मीको अनिवार्य उपस्थिति अनि मुलुकको संकटलाई ध्यानमा राखी यो कदम चालिएको मन्त्रालयले स्पष्ट पारेको छ ।
यसका साथै, भदौ २२ गतेका लागि विनियोजित दिवसको बजेट प्रधानमन्त्री दैवी प्रकोप उद्धार कोषमा हस्तान्तरण गर्ने व्यवस्था मिलाउन मातहतका निकायहरूलाई निर्देशन दिइएको छ ।
