काठमाडौँ । मलेसियामा जारी एसीसी प्रिमियर कपको फाइनलमा नेपालले संयुक्त अरब इमिरेट्स (युएई) सँग प्रतिस्पर्धा गर्ने तय भएको छ ।
उत्कृष्ट बलिङ प्रदर्शन गर्दै नेपालले सेमिफाइनलमा ओमानलाई पन्छाएको थियो भने अर्को सेमिफाइनलमा हङकङ चाइनालाई हराउँदै युएईले अन्तिम दुईको यात्रा पक्का गरेको हो ।
उपाधि भिडन्त शनिबार बिहान ७:१५ बजे मलेसियाको क्वालालम्पुरस्थित क्रिकेट मैदानमा सुरु हुनेछ । सोही दिन तेस्रो स्थानका लागि ओमान र हङकङ चाइनाबीच पनि प्रतिस्पर्धा हुने कार्यक्रम छ ।
एकदिवसीय क्रिकेटको इतिहास हेर्दा नेपाल र युएईबीच हालसम्म १५ वटा खेल भएका छन् । जसमध्ये नेपालले ९ खेलमा जित दर्ता गरेको छ भने युएई ६ खेलमा विजयी भएको छ ।
नेपाल क्रिकेट संघ (क्यान) ले सन्दीप लामिछानेको कप्तानीमा १४ सदस्यीय टोली यस प्रतियोगिताका लागि मलेसिया पठाएको हो । टोलीमा कप्तान लामिछानेसँगै आसिफ शेख, अर्जुन कुमाल, रोहित पौडेल, देव खनाल, दिपेन्द्र सिंह ऐरी, बसिर अहमद, इशान पाण्डे, गुलशन झा, शेर मल्ल, ललित राजवंशी, करण केसी, हेमन्त धामी र सन्दीप जोरा समेटिएका छन् ।
यस प्रतियोगिताको विजेता टोलीले सन् २०२७ को जुनमा बंगलादेशमा आयोजना हुने एसिया कपमा स्थान सुरक्षित गर्नेछ । टेस्ट मान्यता प्राप्त भारत, पाकिस्तान, बंगलादेश, श्रीलंका र अफगानिस्तान भने एसिया कपका लागि सोझै छनोट भइसकेका छन् ।
