काठमाडौँ । बाढीका कारण अतिप्रभावित भई विपद् सङ्कटग्रस्त घोषणा गरिएका पाँच जिल्लाका १५ स्थानीय तहका बाढीपीडित परिवारले सरकारबाट तत्काल राहत पाउने भएका छन् ।
गृह मन्त्रालयले रसुवा, नुवाकोट, धादिङ, तनहुँ र गोरखाका सम्बन्धित जिल्ला प्रशासन कार्यालयलाई पत्राचार गर्दै राहत वितरण प्रक्रिया अघि बढाउन निर्देशन दिएको हो ।
भदौ २५ गते बसेको मन्त्रिपरिषद् बैठकको निर्णय अनुसार बाढीबाट घरबारविहीन भएका परिवारलाई अस्थायी बसोबास र जीविकोपार्जनका लागि यो सहयोग उपलब्ध गराउन लागिएको हो ।
सरकारले तय गरेको मापदण्ड अनुसार चार जनासम्म सदस्य रहेको परिवारलाई प्रतिमहिना १५ हजार रुपैयाँका दरले राहत उपलब्ध गराइनेछ । परिवारमा चार जनाभन्दा बढी सदस्य भएमा प्रत्येक थप सदस्य बराबर मासिक दुई हजार रुपैयाँ थप गरी रकम प्रदान गरिनेछ ।
यो सुविधा सरकारी होल्डिङ सेन्टरमा नबसी आफ्नै व्यवस्थापनमा अस्थायी रूपमा बसोबास गर्न चाहने बाढीपीडितका लागि मात्र लागू हुनेछ । बाढीले घर पूर्ण रूपमा क्षति भई बस्न अयोग्य भएका परिवारलाई वैकल्पिक व्यवस्था नभएसम्म बढीमा ६ महिनाका लागि मात्र यो राहत प्रदान गरिने जनाइएको छ ।
