काठमाडौँ । मुलुकभर पश्चिमी वायुका साथै मनसुनी प्रणालीको आंशिक प्रभाव कायम रहँदा पहाडी तथा हिमाली भेगमा बदली र हल्का वर्षाको सम्भावना देखिएको छ । जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा हाल सरदर स्थानकै आसपासमा अवस्थीति रहेको छ ।
महाशाखाका अनुसार आज तराई भेगमा मौसम सामान्यतया सफा रहे पनि पहाडी र हिमाली क्षेत्रमा भने आंशिकदेखि साधारणतया बदली रहनेछ ।
कोशी र बागमती प्रदेशका पहाडी तथा हिमाली भू-भागका थोरै स्थानहरूका साथै गण्डकी, लुम्बिनी, कर्णाली र सुदूरपश्चिम प्रदेशका एक-दुई स्थानमा हलुका वर्षा तथा हिमपातको सम्भावना रहेको छ ।
यस्तै, आज राति पनि कोशी, बागमती र गण्डकी प्रदेशका पहाडी तथा हिमाली भागमा मुख्यतया बदली रहनेछ । तराई क्षेत्रमा भने मौसम सफा नै रहने र पूर्वी तथा मध्य पहाडी भेगका एकाध ठाउँमा हल्का वर्षा वा हिमपात हुनसक्ने महाशाखाले जनाएको छ ।
