काठमाडौँ । आइसीसी क्रिकेट विश्वकप लिग-२ अन्तर्गत मंगलबार सम्पन्न खेलमा नेपालले घरेलु टोली ओमानमाथि ११३ रनको उत्कृष्ट जित हासिल गरेको छ । अल अमेरात क्रिकेट स्टेडियममा भएको खेलमा नेपालले प्रस्तुत गरेको २६४ रनको लक्ष्य पछ्याएको ओमान १५० रनमै समेटियो ।
नेपालले दिएको चुनौतीपूर्ण लक्ष्य पछ्याउने क्रममा ओमान ४० ओभरमै अलआउट हुन पुग्यो । ओमानको इनिङ्सलाई ध्वस्त पार्न नेपाली बलर नन्दन यादव र सन्दीप लामिछानेले ३-३ विकेट चटकाए भने दीपेन्द्रसिंह ऐरीले २ तथा करण केसी र ललित राजवंशीले १-१ विकेट हात पारे । ओमानका तर्फबाट कप्तान विनायक शुक्लाले सर्वाधिक ७७ रनको योगदान दिए पनि टोलीलाई जित दिलाउन सकेनन् ।
यसअघि टस जितेर पहिले ब्याटिङ रोजेको नेपालले निर्धारित ५० ओभरमा ८ विकेट गुमाउँदै २६३ रनको बलियो योगफल तयार पारेको थियो । नेपालका लागि कप्तान रोहित पौडेलले ६१ रनको अर्धशतकीय इनिङ्स खेलेका थिए । यस्तै अर्जुन कुमाल र करण केसीले समान ४०-४० रन जोडे भने बशीर अहमद र ईशान पाण्डेले ३७-३७ रन तथा दीपेन्द्रसिंह ऐरीले २२ रनको योगदान दिए । ओमानका बलर शाह फैजल, शकील अहमद र करण सोनावालेले २-२ विकेट तथा हसनैन शाहले १ विकेट लिएका थिए ।
यो सानदार जितसँगै नेपालको ३४ खेलबाट २८ अंक पुगेको छ र लिग-२ को तालिकामा छैटौं स्थानमा यथावत छ । नेपालले अब आफ्नो आगामी खेल अक्टोबर १७ मा क्यानडा र अक्टोबर १९ मा पुनः ओमानसँग खेल्नेछ ।
