काठमाडौँ । बडादसैँको प्रमुख आकर्षणका रूपमा रहेको फूलपाती पर्व आज घरघरमा नवपत्रिका भित्र्याएर हर्षोल्लासका साथ मनाइँदैछ ।
घटस्थापनादेखि सुरु भएको नवरात्रको सातौँ दिन आश्विन शुक्ल सप्तमीका अवसरमा वैदिक विधिपूर्वक नवदुर्गाका नौवटा प्रतीकस्वरूप धार्मिक वनस्पतिलाई पूजा कोठा वा दसैँघरमा प्रवेश गराइने परम्परा छ ।
नेपाल पञ्चाङ्ग निर्णायक समितिका अनुसार उखु, हलेदो, केराको बोट, धानको बाला, बेलपत्र, दारिम, जयन्ती, अशोक र मानवृक्ष गरी नौ किसिमका वनस्पति (नवपत्रिका) लाई विभिन्न देवीको स्वरूप मानी भित्र्याउने गरिन्छ । फूलपाती भित्र्याउन कुनै विशेष साइतको आवश्यकता नपरे पनि हनुमानढोकास्थित दसैँघरका लागि गोरखाबाट ल्याइएको फूलपाती जमलबाट बाजागाजा, पञ्चेबाजा, गुर्जुको पल्टन र सांस्कृतिक झाँकीसहित दरबार पुर्याउने परम्परा कायम छ ।
फूलपातीको दिनदेखि सरकारी कार्यालयहरूमा सार्वजनिक बिदा सुरु हुने भएकाले राजधानीलगायत सहरी क्षेत्रबाट मानिसहरू घर फर्कने क्रम तीव्र बनेको छ । गाउँघरतिर लिङ्गे तथा रोटे पिङ हालेर दसैँको रौनकता अझ बढेको छ ।
यसैबिच समितिले आगामी कार्तिक ३ गते विजयादशमीका दिन देवी विसर्जन बिहान ८: ४८ बजे र टीकाको शुभ साइत बिहान १०: २६ बजेका लागि तोकेको छ ।
