काठमाडौँ । पछिल्लो २४ घण्टामा देशका विभिन्न भागमा भएका सवारी दुर्घटनामा परी १४ जनाले ज्यान गुमाएका छन् ।
नेपाल प्रहरीका अनुसार देशभरका फरक-फरक सडक खण्डमा भएका यी दुर्घटनाहरूमा अन्य १२१ जना घाइते भएका छन् ।
प्रहरीको तथ्याङ्क अनुसार दुर्घटनाबाट सबैभन्दा धेरै क्षति मधेश प्रदेशमा भएको छ, जहाँ ५ जनाको ज्यान गएको छ। यस्तै काठमाडौँ उपत्यका, लुम्बिनी, बागमती र गण्डकी प्रदेशमा २-२ जना तथा कोशी प्रदेशमा १ जनाको मृत्यु भएको छ ।
घाइते हुनेहरूमा कोशी प्रदेशका २८ जना, लुम्बिनीका २७ जना र मधेश प्रदेशका २३ जना रहेका छन् ।
यसैगरी काठमाडौँ उपत्यकामा १५ जना, सुदूरपश्चिममा १३ जना, कर्णालीमा ९ जना, गण्डकीमा ५ जना र बागमती प्रदेशमा १ जना घाइते भएका छन् ।
घाइतेहरूलाई उपचारका लागि नजिकैका स्वास्थ्य संस्था तथा अस्पतालहरूमा भर्ना गरिएको छ ।
