काठमाडौँ । देशमा हाल पश्चिमी न्यून चापीय प्रणालीका साथै मनसुनी वायुको समेत प्रभाव रहेको छ ।
जल तथा मौसम विज्ञान विभाग, मौसम पूर्वानुमान महाशाखाका अनुसार अहिले बागमती, गण्डकी, कर्णाली र लुम्बिनी प्रदेशका सबै क्षेत्रका साथै कोशी र सुदूरपश्चिम प्रदेशको पहाडी तथा हिमाली भू-भागमा साधारणतया बदली भएको छ । त्यस्तै मधेश प्रदेशसहित कोशी र सुदूरपश्चिमका तराई भू-भागमा आंशिक बदली रहेको छ । गण्डकी र लुम्बिनीका केही स्थान तथा बागमती, कर्णाली र सुदूरपश्चिमका एक-दुई ठाउँमा मेघगर्जन र चट्याङसहित मध्यम वर्षा भइरहेको छ ।
आज दिउँसो कोशी, बागमती र गण्डकी प्रदेशका पहाडी भू-भागका केही स्थानमा मेघगर्जन र चट्याङसहित मध्यम वर्षाको सम्भावना छ । साथै लुम्बिनी, कर्णाली र सुदूरपश्चिमका पहाडी क्षेत्रमा मेघगर्जन, चट्याङ र असिनासहित हल्का वर्षा वा हिमपात हुनसक्ने महाशाखाले जनाएको छ । तराईतर्फ मधेश, कोशी, बागमती र गण्डकीका थोरै स्थानमा मध्यम वर्षाको सम्भावना छ भने बागमती र गण्डकीका पहाडी तथा तराईका एक-दुई स्थानमा भारी वर्षा हुनसक्ने पूर्वानुमान छ ।
आज राति कोशी प्रदेशका सबै क्षेत्र तथा बाँकी प्रदेशका हिमाली र पहाडी भू-भागमा साधारणतया बदली रहनेछ । कोशी र मधेशका तराई क्षेत्रका थोरै स्थानमा मेघगर्जन र चट्याङसहित मध्यम वर्षाको सम्भावना रहेको छ भने देशका अन्य पहाडी तथा हिमाली भू-भागका एक-दुई स्थानमा हल्का वर्षा वा हिमपातको सम्भावना छ ।
