सिमरा । बाराको सिमरामा उच्च शिक्षाको सुधार तथा राष्ट्रिय योग्यता प्रारूपसम्बन्धी दुईदिने उच्चस्तरीय संवाद कार्यक्रम सुरु भएको छ ।
शिक्षा तथा खेलकुद मन्त्रालय र युनेस्को नेपालको संयुक्त आयोजनामा सञ्चालित यस कार्यक्रममा सङ्घीय सांसद, प्रदेश सरकारका प्रतिनिधि, विश्वविद्यालयका पदाधिकारी, नीति निर्माता, नागरिक समाज तथा शिक्षाविद्हरूको सहभागिता छ ।
कार्यक्रमको पहिलो सत्रमा विश्वविद्यालय अनुदान आयोगका अध्यक्ष प्राडा खड्गबहादुर केसीले मधेश प्रदेशको उच्च शिक्षाको समग्र स्थिति, सम्भावना र चुनौतीबारे कार्यपत्र प्रस्तुत गरेका छन् । दुई दिनसम्म चल्ने यो संवादमा मधेश प्रदेशका जिल्लागत सम्भाव्यता, सुधारका रणनीति र उच्च शिक्षामा विश्वविद्यालयहरूको भूमिका विषयमा समूहगत छलफल हुने जनाइएको छ ।
राष्ट्रिय योग्यता प्रारूपअन्तर्गत औपचारिक, अनौपचारिक तथा परम्परागत सीपमार्फत प्राप्त ज्ञानलाई प्रमाणीकरण र एकीकृत गर्ने नीतिगत प्रयासलाई विशेष प्राथमिकता दिइएको छ । यसैक्रममा शिक्षा मन्त्रालयका सहसचिव जयराम अधिकारीले वैकल्पिक तथा परम्परागत माध्यमबाट सीप हासिल गरेका व्यक्तिहरूलाई समेत राष्ट्रिय योग्यता प्रणालीमा समेट्ने र क्रेडिट ट्रान्सफर प्रणालीलाई सहज बनाउने लक्ष्य राखिएको जानकारी दिए ।
