काठमाडौँ । भन्सार विभागले मातहतका विभिन्न कार्यालयमा कार्यरत २७२ जना कर्मचारीको सरुवा गर्ने गरी यसअघि गरेको निर्णय अर्थमन्त्रीको ठाडो हस्तक्षेपपछि खारेज भएको छ ।
विभागले गत कात्तिक २० गते ६९ जना शाखा अधिकृत र २०३ जना नायब सुब्बा (नासु) को सरुवा गरेको थियो ।
सरुवा प्रक्रियामा पारदर्शिता नअपनाइएको र अन्यायपूर्ण ढंगले निर्णय भएको भन्दै अर्थ मन्त्रालयमा गुनासो तथा उजुरी परेपछि अर्थमन्त्री डा. स्वर्णिम वाग्लेले सोमबार उक्त निर्णय तत्काल बदर गर्न निर्देशन दिएका हुन् । मन्त्री वाग्लेको निर्देशन लगत्तै निमित्त अर्थसचिव डा. सुमन दाहालले भन्सार विभागलाई लिखित पत्राचार गरेपछि सरुवा रद्द गर्ने प्रक्रिया कार्यान्वयनमा आएको हो ।
अर्थ मन्त्रालयका अनुसार अब परम्परागत शैलीको साटो प्रविधिमैत्री प्रणालीको विकास गरी स्पष्ट मापदण्डका आधारमा मात्र कर्मचारीको नयाँ सरुवा प्रक्रिया अघि बढाइनेछ । साथै, विवादास्पद र अपारदर्शी ढंगले सरुवा गरिएको विषयमा सत्यतथ्य पत्ता लगाउन मन्त्री वाग्लेको निर्देशनमा मन्त्रालयले आन्तरिक छानबिन समेत सुरु गरेको छ ।

