काठमाडौँ । विश्व प्रतिजैविक प्रतिरोध सचेतना सप्ताह–२०२६ का अवसरमा बुधबार आयोजित एक कार्यक्रममा सरोकारवाला निकायबीचको समन्वय बिना एन्टिबायोटिकको दुरुपयोग रोक्न नसकिनेमा जोड दिइएको छ ।
औषधि व्यवस्था विभागका महानिर्देशक भरत भट्टराईले मानव स्वास्थ्य, पशु स्वास्थ्य र वातावरण क्षेत्रको संयुक्त प्रयासबाट मात्र प्रतिजैविक प्रतिरोध (एन्टिमाइक्रोबियल रेसिस्टेन्स) को जोखिम कम गर्न सकिने स्पष्ट पार्नुभयो ।
स्वास्थ्य तथा खाद्य स्वच्छता मन्त्रालयबाट सुरु भई औषधि व्यवस्था विभागमा पुगेर समापन भएको प्रभातफेरी कार्यक्रममा बोल्दै महानिर्देशक भट्टराईले एन्टिबायोटिकको अनावश्यक, अत्यधिक तथा अपूरो प्रयोगले जनस्वास्थ्यमा गम्भीर चुनौती थपेको बताउनुभयो । औषधिको प्रभावकारिता जोगाइराख्न यसको बिक्री–वितरण र प्रयोगलाई कडाइका साथ नियमन गर्नुपर्ने उहाँको भनाइ थियो । विशेषगरी भविष्यका जटिल उपचारका लागि सुरक्षित राखिएका ‘रिजर्भ एन्टिबायोटिक’ को जथाभावी प्रयोग तत्काल रोकिनुपर्नेमा उहाँले ध्यानाकर्षण गराउनुभयो ।
प्रतिजैविक प्रतिरोधको समस्या मानिसमा मात्र सीमित नभई पशुपन्छी र वातावरणसँग समेत प्रत्यक्ष जोडिएको भट्टराईले उल्लेख गर्नुभयो । यस वर्ष ‘एक स्वास्थ्य, एक प्रयास : प्रतिजैविक प्रतिरोध रोकौँ’ भन्ने नाराका साथ सचेतना सप्ताह मनाइँदै छ ।
स्वास्थ्य मन्त्रालय, विभाग तथा पशु र वातावरण क्षेत्रका निकायबीचको सहकार्यसँगै आम नागरिकमा जनचेतना फैलाउन सके मात्र औषधिको जिम्मेवार प्रयोग सुनिश्चित भई यो समस्या समाधान हुने विश्वास गरिएको छ ।

