काठमाडौँ । नेपाल प्रिमियर लिग (एनपीएल) अन्तर्गत लिग चरणको अन्तिम खेलमा काठमाडौँ गोर्खाजमाथि सात रनको रोमाञ्चक जित निकाल्दै सुदूरपश्चिम रोयल्स प्लेअफमा प्रवेश गरेको छ ।
यस जितसँगै सुदूरपश्चिम एनपीएलको इतिहासमा लगातार प्लेअफमा स्थान बनाउने एक्लो टोली बनेको छ ।
लिग चरणका सात खेलमध्ये पाँचमा जित र दुईमा हार बेहोरेको सुदूरपश्चिम १० अङ्कसहित तालिकाको शीर्षस्थानमा रहँदै अघिल्लो चरणमा पुगेको हो । अर्कोतर्फ, सुदूरपश्चिमसँग पराजित भएसँगै काठमाडौँले प्लेअफ समीकरण पूरा गर्न लिगको अन्तिम खेल कुर्नुपर्ने भएको छ । छ खेलबाट चार जित र दुई हारसहित आठ अङ्क जोडेको काठमाडौँ तालिकाको तेस्रो स्थानमा छ र उसले अब पोखरा एभेन्जर्सको सामना गर्नेछ ।
जितका लागि १२६ रनको लक्ष्य पछ्याएको काठमाडौँले निर्धारित २० ओभरमा सात विकेट गुमाउँदै ११८ रन मात्र जोड्न सक्यो । काठमाडौँलाई अन्तिम ओभरमा जितका लागि १६ रनको आवश्यकता रहे पनि आठ रन मात्र जोड्न सकेपछि हार बेहोर्नुपरेको हो । काठमाडौँका ब्याटर रासिद खानले सर्वाधिक ३५ रन बनाए भने दुसान हेमान्थाले २१ रनको योगदान दिँदै रनआउट हुन पुगे ।
