काठमाडौँ । दुग्ध विकास संस्थान (डीडीसी) लाई १२ करोड रुपैयाँभन्दा बढी आर्थिक नोक्सानी पुर्याएको अभियोगमा विराटनगर दुग्ध वितरण आयोजनाका प्रमुख नविन किशोर शर्मालाई प्रहरीले नियन्त्रणमा लिएको छ ।
नेपाल प्रहरीको केन्द्रीय अनुसन्धान ब्युरो (सीआईबी) बाट खटिएको टोलीले उनलाई शुक्रबार ललितपुरको भैसेपाटी क्षेत्रबाट पक्राउ गरेको हो । सर्लाहीको रामनगर गाउँपालिका–३ स्थायी ठेगाना भई हाल ललितपुर महानगरपालिका–५ भैसेपाटीमा बसोबास गर्दै आएका शर्मालाई आपराधिक विश्वासघात तथा सङ्गठित अपराधसम्बन्धी कसुरमा समातिएको ब्युरोले जानकारी दिएको छ ।
प्रारम्भिक अनुसन्धानका क्रममा शर्माले संस्थागत हितविपरीत कार्य गरी डीडीसीलाई कुल १२ करोड १३ लाख ४३ हजार ५३० रुपैयाँ बराबरको हानी नोक्सानी पुर्याएको देखिएको छ । उक्त आर्थिक अनियमिततामा अन्य व्यक्तिहरूको समेत मिलेमतो रहेको पाइएपछि प्रहरीले सङ्गठित अपराधको कसुरमा समेत राखेर विस्तृत अनुसन्धान प्रक्रिया अघि बढाएको छ ।
