वीरगञ्ज । मधेश क्षेत्रमा पछिल्लो समय बढेको खडेरी र तातो हावा (लू) का कारण बालबालिकाको स्वास्थ्यमा जोखिम बढेपछि स्थानीय सरकारले विद्यालय बन्द गर्ने निर्णय गरेको छ ।
वीरगञ्ज महानगरपालिकाले बिहीबार एक सूचना जारी गर्दै नगर क्षेत्रभित्र सञ्चालित सम्पूर्ण सरकारी तथा निजी विद्यालयहरूमा चार दिनका लागि बिदा दिने घोषणा गरेको हो ।
महानगरपालिकाको शैक्षिक प्रशासन महाशाखाका अनुसार बढ्दो तापक्रम र चर्को गर्मीले विद्यार्थीहरूको स्वास्थ्यमा प्रतिकूल असर पर्न सक्ने सम्भावनालाई ध्यानमा राखी यो कदम चालिएको हो । आगामी असार ११ गतेदेखि लागू हुने गरी बाल विकास केन्द्रदेखि कक्षा १२ सम्मका सबै विद्यालयहरू बन्द रहनेछन् ।
यो बिदा विद्यालयहरूले पाउने वार्षिक वर्षे बिदाबाट कट्टा हुने गरी समायोजन गरिएको महानगरले जनाएको छ । तराई-मधेशका रैथाने जिल्लाहरूमा केही दिनयता लगातार तापक्रम वृद्धि हुँदा सर्वसाधारणको दैनिक जीवनयापन समेत कष्टकर बन्दै गएको छ ।
