काठमाडौँ । संवैधानिक निकायका प्रस्तावित पदाधिकारीहरूको योग्यता र कार्ययोजनामाथि संसदीय समितिले छलफल सुरु गर्ने भएको छ ।
प्रमुख निर्वाचन आयुक्त र निर्वाचन आयुक्त पदमा सिफारिस भएका व्यक्तिहरूको सुनुवाइ प्रक्रिया अघि बढाउन आज संसदीय सुनुवाइ समितिको बैठक बस्न लागेको हो ।
समितिका अनुसार बिहान साढे ९ बजेदेखि सुरु हुने उक्त बैठकमा प्रस्तावित व्यक्तिहरूविरुद्ध परेका उजुरी र उनीहरूको भावी कार्ययोजनाका विषयमा छलफल हुने कार्यसूची तय गरिएको छ ।
यसअघि असार १९ गते बसेको संवैधानिक परिषद्को बैठकले प्रमुख निर्वाचन आयुक्तमा मानबहादुर कार्की तथा आयुक्त पदका लागि डा. राजीव सुब्बा र गुरु वाग्लेको नाम सिफारिस गरी संसदीय सुनुवाइका लागि पठाएको थियो । समितिबाट नाम अनुमोदन भएपछि उनीहरूलाई राष्ट्रपतिले नियुक्त गर्ने कानुनी व्यवस्था छ ।
