काठमाडौँ । नयाँ करका दर समायोजन र प्रणाली सुधारका लागि यातायात व्यवस्था विभागले सेवाग्राहीलाई साउन ८ गतेसम्म कार्यालय नआउन अनुरोध गरेको छ ।
विभागले सोमबार सार्वजनिक सूचना जारी गर्दै अत्यावश्यक परेको अवस्थामा बाहेक अन्य सेवा लिनका लागि केही दिन पर्खन आग्रह गरेको हो । यातायात क्षेत्रसँग सम्बन्धित विभिन्न प्रविधि तथा प्रणालीहरूलाई थप सेवाग्राहीमैत्री र व्यवस्थित बनाउन अहिले डेटा स्थानान्तरणको काम भइरहेको विभागले जनाएको छ । यसका साथै प्रदेश सरकारहरूले निर्धारण गरेका नयाँ करका दररेटहरूलाई पनि प्रणालीमा प्रविष्टि र मिलान गर्ने कार्य जारी छ ।
सूचना अनुसार यी सम्पूर्ण प्राविधिक कार्यहरू पूर्ण रूपमा सम्पन्न भई कार्यान्वयनमा आउन करिब एक साताको समय लाग्नेछ । त्यसैले साउन ८ गतेपछि मात्र सम्बन्धित यातायात कार्यालयहरूमा सम्पर्क गरी सेवा लिन विभागले नागरिकलाई आग्रह गरेको छ ।
