काठमाडौँ । सरकारी स्वामित्वमा सञ्चालित नेपाल औषधि लिमिटेडको सेवा प्रवाह र उत्पादन क्षमता वृद्धि गर्न सरकारले पहल थालेको छ ।
उद्योग, वाणिज्य तथा आपूर्ति मन्त्री गौरिकुमारी यादवले बबरमहलस्थित लिमिटेडको कार्यालयमै पुगेर त्यहाँको वस्तुस्थिति, उत्पादन क्षमता र भोगिरहेका समस्याबारे प्रत्यक्ष जानकारी लिनुभएको हो । मन्त्रालयका सचिव नारायणप्रसाद शर्मा दुवाडीसहित उच्च अधिकारीहरू सहभागी अनुगमनका क्रममा लिमिटेडका महाप्रबन्धक कैलाश पनेरुले हाल २५ प्रकारका अत्यावश्यक औषधि उत्पादन भइरहेको तर ढुवानीका साधन नहुँदा वितरणमा समस्या परेको बताउनुभयो । विगतको आन्दोलनका क्रममा ढुवानीका साधन जलेपछि नयाँ व्यवस्था हुन नसकेको विषय थाहा पाएलगत्तै मन्त्री यादवले सचिवलाई तत्काल सवारीसाधनको प्रबन्ध मिलाउन निर्देशन दिनुभयो ।
वर्षौंदेखि घाटामा रहेको यो संस्थान यस आर्थिक वर्षमा करिब दुई करोड रुपैयाँ नाफामा जान सफल भएको जानकारी पाउँदा मन्त्री यादवले खुसी व्यक्त गर्नुभयो ।
सरकारी उद्योगहरू आफ्नै आम्दानीबाट कर्मचारी व्यवस्थापन र सञ्चालन खर्च धान्न सक्ने गरी आत्मनिर्भर बन्नुपर्ने उहाँको भनाइ थियो । उहाँले उत्पादन वृद्धि, सेवा विस्तार र संस्थागत सुदृढीकरणमा ध्यान दिन आग्रह गर्नुभयो । यस्तै, जनशक्ति अभावका कारण औषधि उत्पादन प्रभावित भएको विषयमा मन्त्रालयबाट आवश्यक समन्वय र सहजीकरण गर्ने प्रतिबद्धतासमेत उहाँले जनाउनुभयो ।
