काठमाडौँ । अवैध सट्टेबाजी र वित्तीय ठगी नियन्त्रण गर्न नेपाल दूरसञ्चार प्राधिकरणले आक्रामक कदम चालेको छ ।
फिफा विश्वकप सुरु भएयता प्राधिकरणले गेम्ब्लिङ तथा अवैधानिक वित्तीय कारोबार सञ्चालन भइरहेका दुई लाख २३ हजार ५६८ भन्दा बढी वेबसाइट र मोबाइल एपमाथि प्रतिबन्ध लगाएको छ । विश्वकपका बेला अनलाइन बेटिङको जोखिम उच्च हुने भएकाले प्रधानमन्त्री तथा मन्त्रिपरिषद्को कार्यालयको निर्देशन र चासोपछि प्राधिकरणले विशेष कार्यदल नै बनाएर यो कारबाही थालेको हो ।
प्राधिकरणका सहायक निर्देशक एवं इन्जिनियर ओमप्रकाश महतोका अनुसार कार्यदलले इन्टरनेट सेवा प्रदायक (आईएसपी) का प्रतिनिधिहरूसँग प्रत्यक्ष सहकार्य गरी चौबीसै घण्टा यस्ता यूआरएलहरू ब्लक गर्ने काम गरिरहेको छ । एउटा वेबसाइट बन्द गर्दा अर्को नयाँ खडा हुने चुनौतीलाई सम्बोधन गर्न प्राविधिक टोलीले ‘थ्रेड इन्टेलिजेन्स टुल’ मार्फत नयाँ साइटहरूको पहिचान र ब्लकिङ निरन्तर गरिरहेको छ । सर्वसाधारणले पनि यस्ता गैरकानुनी साइटहरूबारे जानकारी पाइएमा github.com/NTA-OPM मा गएर रिपोर्ट गर्न सक्ने व्यवस्था मिलाइएको छ ।
