काठमाडौँ । राष्ट्रिय स्वतन्त्र पार्टी (रास्वपा) ले आफ्ना संघीय सांसदहरूका लागि स्वकीय सचिव नियुक्ति तथा व्यवस्थापनसम्बन्धी आन्तरिक मार्गदर्शन जारी गरेको छ ।
राज्यकोषबाट प्राप्त हुने सुविधाको उच्चतम सदुपयोग गर्दै नियुक्ति प्रक्रियालाई पारदर्शी, मितव्ययी र जनउत्तरदायी बनाउने उद्देश्यले पार्टीले नयाँ मापदण्ड तोकेको हो ।
मन्त्रिपरिषद्ले हालै गरेको निर्णयअनुसार सांसदहरूले राजपत्राङ्कित तृतीय श्रेणी (शाखा अधिकृत सरह) को एक जना स्वकीय सचिव राख्न पाउने व्यवस्था छ । सोही व्यवस्थालाई टेकेर रास्वपाले जारी गरेको निर्देशनमा नातावाद र परिवारवादलाई पूर्ण रूपमा निषेध गरिएको छ । अब रास्वपा सांसदहरूले एकाघरका सदस्य वा नजिकका नातेदारलाई स्वकीय सचिव नियुक्त गर्न पाउने छैनन् ।
स्वकीय सचिवका लागि स्नातक तह वा सोसरह उत्तीर्ण हुनुपर्नेछ भने प्रविधिमैत्री, अनुसन्धान कौशल र पार्टीका मूल्य-मान्यताप्रति प्रतिबद्ध व्यक्तिलाई प्राथमिकता दिइनेछ । साथै, योग्यता पुगेका उम्मेदवारहरूमध्ये महिला, सीमान्तकृत र पछाडि पारिएका वर्गलाई प्रोत्साहन गर्न भनिएको छ ।
नियुक्ति प्रक्रियालाई खुला प्रतिस्पर्धात्मक बनाउन संसदीय दलले एउटा साझा विज्ञापन ढाँचा तयार गर्ने र सांसदहरूले सोही आधारमा दरखास्त आह्वान गर्नुपर्ने व्यवस्था गरिएको छ । छनोट भएका उम्मेदवारलाई नियुक्त गर्नुअघि रास्वपा संसदीय दलबाट अनिवार्य अन्तिम स्वीकृति लिनुपर्नेछ ।
स्वकीय सचिवको पारिश्रमिकबाट कुनै पनि रकम कट्टा गर्न वा असुल्न नपाइने र रकम सिधै बैंक खातामा जम्मा हुनुपर्नेछ । निर्देशिका उल्लङ्घन गरेमा वा फर्जी सचिव खडा गरी सुविधा लिएको पाइएमा केन्द्रीय अनुशासन समितिले कारबाही गर्ने चेतावनी पार्टीले दिएको छ ।
