काठमाडौँ । मुलुकभरका स्वास्थ्य संस्थाबाट प्रदान गरिने १० प्रतिशत निःशुल्क उपचार सुविधालाई पारदर्शी र प्रभावकारी बनाउन सरकारले विशेष पहल थालेको छ ।
स्वास्थ्य तथा खाद्य स्वच्छता मन्त्रालयले सोमबार एक सूचना जारी गर्दै सेवाप्रदायक अस्पतालहरू र तिनका जिम्मेवार सम्पर्क अधिकारीहरूको नाम तथा फोन नम्बर सर्वसाधारणको जानकारीका लागि सार्वजनिक गरेको हो ।
विभिन्न अस्पतालमा आरक्षित शय्या तथा उपचार सुविधा पाउन नसकेको गुनासो आएपछि मन्त्रालयले समन्वयका लागि फोकल पर्सन तोकेको हो । यस सूचीमा केन्द्रीय, प्रादेशिक, सामुदायिक, शिक्षण तथा निजी क्षेत्रका अस्पतालहरू समेटिएका छन् । उपचारका क्रममा कुनै समस्या उत्पन्न भएमा वा सेवा प्राप्त गर्न कठिनाइ भएमा बिरामी तथा तिनका आफन्तले सम्बन्धित अधिकारीलाई सिधै सम्पर्क गर्न सक्ने व्यवस्था मिलाइएको छ ।
सरकारले तोकेको विपन्न लक्षित यो सुविधालाई कागजमा मात्र सीमित नराखी व्यवहारमै लागू गराउन अनुगमनलाई समेत तीव्र पारिएको छ । मन्त्रालयले यसअघि नै निःशुल्क शय्याको स्थिति हेर्न सकिने अनलाइन प्रणाली कार्यान्वयनमा ल्याइसकेको छ, जसमा अस्पतालहरूले आफ्ना आरक्षित शय्याको अद्यावधिक विवरण प्रविष्ट गर्नु अनिवार्य गरिएको छ ।
कुनै पनि अप्ठ्यारो परेमा सार्वजनिक सूचीका फोन नम्बरमा सम्पर्क गरी सेवा र जानकारी लिन मन्त्रालयले सर्वसाधारणलाई आग्रह गरेको छ ।
