काठमाडौँ । नयाँ विधेयकहरू पेस र समिति प्रतिवेदन प्रस्तुत गर्ने मुख्य कार्यसूचीसहित प्रतिनिधि सभाको बैठक आज आह्वान गरिएको छ । सङ्घीय संसद सचिवालयका अनुसार दिउँसो १ बजेदेखि बैठक सुरु हुनेछ ।
बैठकमा राज्य व्यवस्था तथा सुशासन समितिका सभापति हरि ढकालले ‘नेपाल विशेष सेवा ऐन, २०४२ को साविकको व्यवस्था जगाउने सम्बन्धी विधेयक सम्बन्धी समितिको प्रतिवेदन, २०८३’ पेस गर्ने तयारी छ ।
यस्तै प्रधानमन्त्री वालेन्द्र शाहको तर्फबाट कानुन, न्याय तथा संसदीय मामिला मन्त्री सोबिता गौतमले ‘संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी (पहिलो संशोधन) विधेयक, २०८३’ प्रस्तुत गर्न अनुमति माग्ने र विधेयक पेस गर्ने कार्यसूची रहेको छ ।
बैठकमा अन्य मन्त्रीहरूले पनि आ-आफ्नो मन्त्रालयसँग सम्बन्धित विधेयकहरू पेस गर्नेछन् । उद्योग, वाणिज्य तथा आपूर्ति मन्त्री गौरी कुमारीले ‘खानी तथा खनिज पदार्थ विधेयक, २०८३’, महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सीता वादीले ‘मानव बेचबिखन तथा ओसारपसार (नियन्त्रण) (पहिलो संशोधन) विधेयक, २०८३’ र परराष्ट्रमन्त्री शिशिर खनालले ‘राहदानी (पहिलो संशोधन) विधेयक, २०८३’ संसदमा प्रस्तुत गर्न अनुमति माग्दै दर्ता गराउने कार्यसूची तय भएको छ ।
