काठमाडौँ । संघीय संसद अन्तर्गत आज प्रतिनिधि सभाका तीन र राष्ट्रिय सभाका दुई गरी कुल पाँच वटा समितिका बैठकहरू बस्दैछन् ।
बिहान साढे ९ बजे कृषि तथा प्राकृतिक स्रोत समितिको बैठक बस्ने कार्यसूची छ। सो बैठकमा कृषि, वन तथा पर्यावरण मन्त्रालयद्वारा गठित मानव–वन्यजन्तु द्वन्द्व व्यवस्थापन प्राविधिक कार्यदलले तयार पारेको प्रतिवेदनमाथि विस्तृत छलफल हुनेछ ।
त्यस्तै, बिहान १० बजे पूर्वाधार विकास समितिको बैठक बोलाइएको छ। उक्त बैठकमा पूर्वाधार विकास तथा सार्वजनिक–निजी साझेदारीको विषयलाई लिएर लगानी बोर्ड र निजी क्षेत्रका प्रतिनिधिहरूसँग विचार-विमर्श गरिनेछ ।
बिहान ११ बजे बस्ने अन्तर्राष्ट्रिय सम्बन्ध र पर्यटन समितिको बैठकमा ‘पर्यटन विधेयक, २०८१’ का सम्बन्धमा नेपाल पर्वतारोहण संघ लगायतका सरोकारवाला निकायहरूसँग छलफल हुने कार्यसूची रहेको छ ।
दिउँसो १ बजे राष्ट्रिय सभा अन्तर्गतको विधायन व्यवस्थापन समितिको बैठक बस्दैछ। उक्त बैठकमा संक्रामक पशु रोग (नियन्त्रण) विधेयक, २०८३ माथि सैद्धान्तिक छलफल गर्ने तयारी छ ।
त्यसैगरी दिउँसो २ बजे राष्ट्रिय सभाकै सार्वजनिक नीति तथा प्रत्यायोजित विधायन समितिको बैठक बस्नेछ। सो बैठकमा विषय विज्ञ धन प्रसाद लामिछानेसँग खर्क नीतिका विविध पक्षमा छलफल हुनेछ ।
