काठमाडौँ । सेवाग्राहीसँग ५० हजार रुपैयाँ घुस लिएको अभियोगमा नापी कार्यालय कलंकीका दुई कर्मचारीविरुद्ध भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगले तत्कालीन नापी अधिकृत हिरालाल पार्धे र सर्भेक्षक अमितकुमार श्रेष्ठविरुद्ध सोमबार विशेष अदालतमा आरोपपत्र दर्ता गराएको हो ।
काठमाडौँको चन्द्रागिरि नगरपालिका वडा नम्बर ९ स्थित जग्गा हालसाबिक गरी कित्ता मिलान गर्नका लागि उनीहरूले ५० हजार रुपैयाँ माग गरेको आयोगको अनुसन्धानबाट खुलेको छ । साविक मच्छेगाउँ–९ग मा परेको जग्गाको कित्ता मिलानमा सहजीकरण गरिदिने बहानामा नियमअनुसार गर्नुपर्ने काम नगरी सेवाग्राहीलाई नियतवश दुःख दिएको अख्तियारले जनाएको छ ।
अख्तियारका अनुसार दुवै जनाले सो रकम सोझै आफूले नलिई कार्यालय सहयोगीमार्फत बुझ्न सहमति जनाएका थिए । भ्रष्टाचार निवारण ऐन, २०५९ बमोजिम कसुर पुष्टि भएपछि आयोगले ५० हजार रुपैयाँ बिगो कायम गर्दै दुवै जनाविरुद्ध कैद र बिगो अनुसार जरिवाना सजायको मागदाबी गरेको छ ।
