काठमाडौँ । जेई संक्रमणको दर तीव्र रूपमा वृद्धि भएसँगै झापा र कैलालीका तोकिएका क्षेत्रमा विशेष खोप अभियान सञ्चालन गरिने भएको छ ।
स्वास्थ्य तथा खाद्य स्वच्छता मन्त्रालयले जोखिमयुक्त क्षेत्रको पहिचान गर्दै असोजको पहिलो सातादेखि दुवै जिल्लामा खोप कार्यक्रम सुरु गर्न लागेको हो । जसअन्तर्गत कैलालीमा असोज १ गतेबाट र झापामा असोज ५ गतेबाट सर्वसाधारणलाई खोप दिइनेछ ।
बाल स्वास्थ्य तथा खोप सेवा शाखाका प्रमुख डा. अभियान गौतमका अनुसार संक्रमणको जोखिम बढी रहेका स्थानलाई लक्षित गरी पहिलो चरणको खोप अभियान सुरु गर्न लागिएको हो ।
अभियानअन्तर्गत झापाका सबै स्थानीय तहका साथै कैलालीका धनगढी उपमहानगरपालिका, लम्किचुहा नगरपालिका र घोडाघोडी नगरपालिकामा ३० वर्ष वा सोभन्दा माथिल्लो उमेर समूहका नागरिकलाई खोप प्रदान गरिनेछ ।
अभियानलाई व्यवस्थित ढङ्गले सञ्चालन गर्न काठमाडौँस्थित केन्द्रीय भण्डारणबाट खोप सम्बन्धित जिल्लाहरूमा पठाउने तयारी भइरहेको छ ।
