काठमाडौँ । भोटेकोशीमा आएको विनाशकारी बाढीबाट प्रभावित क्षेत्रको राहत, उद्धार र दीर्घकालीन पुनरुत्थानका लागि जर्मनीले नेपाललाई ८० लाख युरो (करिब १ अर्ब २५ करोड रुपैयाँ) भन्दा बढीको आर्थिक तथा भौतिक सहायता घोषणा गरेको छ ।
जर्मन सरकारले आपत्कालीन मानवीय सहायताका साथै स्वास्थ्य, ऊर्जा, खानेपानी र विपद् उत्थानशील पूर्वाधार निर्माणका क्षेत्रमा यो सहयोग परिचालन गर्ने भएको हो ।
नेपाल सरकारको अनुरोधपछि युरोपेली सङ्घको नागरिक सुरक्षा संयन्त्रमार्फत त्रिपाल, झुल, भान्साका सामान, फोल्डिङ बेड र खानेपानी उपकरणसहित ५ लाख युरो बराबरका आपत्कालीन सामग्री पठाइएको छ । यस्तै, बाढी प्रभावित गर्भवती महिला, सुत्केरी, नवजात शिशुको स्वास्थ्य सेवा तथा विस्थापित शिविरको अवस्था सुधार गर्न र आयआर्जनका अवसर सिर्जना गर्न दुई नागरिक समाज संस्थामार्फत थप २ लाख युरो प्रत्यक्ष उपलब्ध गराइँदै छ ।
विपद्को दीर्घकालीन प्रभावलाई ध्यानमा राख्दै जर्मन सङ्घीय आर्थिक सहयोग तथा विकास मन्त्रालयले थप ७३ लाख ५० हजार युरो विकास सहयोगअन्तर्गत उपलब्ध गराउनेछ, जसको कार्यान्वयन जर्मन विकास नियोग (GIZ) ले गर्नेछ ।
यसका अतिरिक्त संयुक्त राष्ट्रसङ्घको केन्द्रीय आपत्कालीन प्रतिकार्य कोष (CERF) र युरोपेली सङ्घमार्फत भइरहेका सहायतामा पनि जर्मनीको मुख्य योगदान रहेको छ । जर्मनीले प्रभावित परिवारप्रति समवेदना व्यक्त गर्दै प्राकृतिक विपद्को सामना गर्न नेपालको क्षमता अभिवृद्धिमा निरन्तर साथ दिने प्रतिबद्धता जनाएको छ ।
