काठमाडौँ । सङ्घीय संसद्अन्तर्गतका दुवै सदन प्रतिनिधिसभा र राष्ट्रिय सभाको बैठक आज आयोजना हुँदैछ ।
संसद् सचिवालयले दिएको जानकारीअनुसार प्रतिनिधि सभाको बैठक दिउँसो १ बजे बोलाइएको छ । आजको बैठकमा महिला बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता बादीले ‘बालबालिका सम्बन्धी (पहिलो संशोधन) विधेयक, २०८३ माथि विचार गरियोस्’ भन्ने प्रस्ताव पेश गर्ने मुख्य कार्यसूची तय भएको छ ।
त्यस्तै, राष्ट्रिय सभाको बैठक भने दिउँसो १:१५ बजे सुरु हुनेछ । राष्ट्रिय सभा बैठकमा पूर्वाधार विकास मन्त्रालय एवम् स्वास्थ्य तथा खाद्य स्वच्छता मन्त्रालयसँग सम्बन्धित मौखिक प्रश्नहरूको जवाफ सम्बन्धित मन्त्रीहरूले दिने कार्यक्रम छ ।
यसैगरी, विधायन व्यवस्थापन समितिका सभापति कृष्णबहादुर रोकायले ‘संक्रामक पशु रोग (नियन्त्रण) विधेयक, २०८३ सम्बन्धी समितिको प्रतिवेदन’ सभासमक्ष प्रस्तुत गर्नेछन् ।
साथै, विकास, आर्थिक मामिला तथा सुशासन समितिका सभापति कृष्णप्रसाद पौडेलले ‘मधेश प्रदेशमा खानेपानी, सरसफाइ तथा जलस्रोत व्यवस्थापन सम्बन्धी अध्ययन प्रतिवेदन, २०८३ माथि छलफल गरियोस्’ भन्ने प्रस्ताव पेश गर्ने कार्यसूची रहेको छ ।
