काठमाडौँ । देशभर हाल मनसुनी वायुको प्रभाव कायम रहेको छ । मनसुनको न्यून चापीय रेखा पूर्वमा सरदर स्थानको आसपास र पश्चिममा सरदर स्थानभन्दा दक्षिणतर्फ अवस्थित छ ।
जसका कारण आज देशभर साधारणतया बादल लाग्नुका साथै अधिकांश स्थानमा वर्षा र केही उच्च पहाडी तथा हिमाली भूभागमा हिमपातको सम्भावना रहेको मौसम पूर्वानुमान महाशाखाले जनाएको छ ।
दिउँसो कोशी र बागमती प्रदेशका हिमाली भूभागका केही स्थानमा तथा गण्डकी, लुम्बिनी, कर्णाली र सुदूरपश्चिमका थोरै स्थानमा मेघगर्जन र चट्याङ्गसहित हल्कादेखि मध्यम वर्षा र हिमपातको सम्भावना छ । त्यस्तै, कोशी, बागमती, गण्डकी र लुम्बिनीका पहाडी तथा तराई भूभागका केही स्थानमा मेघगर्जनसहित मध्यम वर्षाको सम्भावना रहेको छ । कोशी प्रदेशका सबै भूभागका साथै बागमती र गण्डकीका पहाडी तथा तराईका एक–दुई स्थानमा भारी वर्षाको समेत आकलन गरिएको छ ।
आज राति पनि देशभर आंशिकदेखि साधारणतया बादल लागिरहनेछ । कोशी, बागमती र गण्डकीका पहाडी तथा तराईका केही स्थानमा वर्षाको सम्भावना कायम रहनेछ भने हिमाली क्षेत्रका थोरै स्थानमा वर्षा तथा हिमपात हुन सक्ने महाशाखाले जनाएको छ ।
