काठमाडौँ । दीपकराज गिरी र दीपाश्री निरौला समूहको बहुप्रतीक्षित नयाँ चलचित्र ‘छ माया छपक्कै २’ आगामी दसैँको अवसर पारेर असोज ३१ गते (फूलपाती) देखि देशभरका सिनेमाघरमा प्रदर्शन हुने भएको छ ।
शनिबार निर्माण पक्षले सार्वजनिक गरेको पहिलो झझल्को (पोस्टर) मा मुख्य कलाकारहरू दीपकराज गिरी, केकी अधिकारी र सनिशा भट्टराईलाई फरक शैलीमा उतारिएको छ । पोस्टरमा केकी र सनिशा दुवैलाई गर्भवती रूपमा देखाइएको छ भने उनीहरूको माझमा दीपकराज गिरी भगवान् श्रीकृष्णको अवतारमा बाँसुरी बजाइरहेका भेटिन्छन् । यो दृश्यले फिल्म हास्यरस र सामाजिक विषयवस्तुमा आधारित रहेको सङ्केत गर्छ ।
दीपेन्द्र लामाको निर्देशन तथा दीपकराज गिरीको लेखनमा बनेको यस चलचित्रमा निर्मल शर्मा, कर्मा शाक्य, जितु नेपाल, रिहान गिरी र रवीन्द्र झा लगायतका कलाकारहरूको अभिनय रहेको छ ।
रोहित अधिकारी निर्माता रहेको यस फिल्ममा दीपक–दीपा समूह र अधिकारीबीच दोस्रो पटक सहकार्य भएको हो ।
