काठमाडौँ । मनसुन सक्रिय भएसँगै हुनसक्ने सम्भावित विपद् र जोखिमलाई ध्यानमा राख्दै काठमाडौँ महानगरपालिकाले कडा सतर्कता अपनाउन थालेको छ । विशेषगरी साना बालबालिकाको सुरक्षा, विद्यालय भवनको अवस्था र बाढी-डुबान हुनसक्ने सम्भावित क्षेत्रहरूमा महानगरले आफ्नो संयन्त्रलाई उच्च सतर्क अवस्थामा राखेको हो ।
विपद् व्यवस्थापन समितिको बैठकले बाढी, पहिरो तथा डुबानको जोखिम घटाउन सबै उद्धार तथा राहत टोलीहरूलाई ‘स्ट्यान्डबाई’ राख्ने निर्णय गरेको छ । जोखिममा रहेका विद्यालयहरूको अवस्था विश्लेषण गरी आवश्यकता अनुसार पठनपाठन रोक्ने अधिकार शिक्षा विभागलाई सुम्पिएको छ ।
खोला तथा नदी किनारका बस्तीहरूमा पूर्वसूचना दिन माइकिङ गर्ने, पानीको निकास रोकिने स्थानहरूको हेरचाह गर्ने र ढल तथा क्याचपिट सफा गर्ने कामलाई तीव्र पारिएको छ । उद्धारका लागि प्रयोग हुने सवारीसाधन, आवश्यक सामग्री र दुई नगर प्रहरी टोलीलाई जुनसुकै बेला खटिन सक्ने गरी तयारी अवस्थामा राखिएको छ ।
त्यस्तै, आपत्कालीन अवस्थामा स्वास्थ्य सेवा सहज बनाउन एम्बुलेन्सहरू तयार राखिनुका साथै स्वास्थ्यकर्मीहरूलाई बिदा वा काजमा बस्न रोक लगाइएको छ । विपद्को बेला प्रभावित नागरिकलाई स्थानान्तरण गर्न विद्यालय र मानव सेवा आश्रमलाई अस्थायी आश्रयस्थल बनाइनेछ । राहत वितरणका लागि छुट्टै टोली गठन गरेको महानगरले नदीमा पानीको सतह बढ्न सक्ने भएकाले सर्वसाधारणलाई उच्च सतर्कता अपनाउन र आधिकारिक सूचनामा मात्र विश्वास गर्न अनुरोध गरेको छ ।
