काठमाडौँ । नेपाल प्रिमियर लिग (एनपीएल) को तेस्रो संस्करण अन्तर्गत आज कीर्तिपुरस्थित त्रिवि क्रिकेट मैदानमा जनकपुर बोल्ट्स र पोखरा एभेन्जर्सबीच रोमाञ्चक प्रतिस्पर्धा हुने भएको छ । आज साँझ ५ बजेबाट सुरु हुने यस खेलमा दुवै टिम जितको खोजीमा मैदान उत्रिनेछन् ।
जारी प्रतियोगितामा जनकपुर बोल्ट्सले अहिलेसम्म दुई खेल खेल्दै एकमा जित र एकमा हार व्यहोरेको छ । पहिलो खेलमा कर्णाली याक्ससँग १९ रनले पराजित भएको जनकपुरले आफ्नो दोस्रो खेलमा भने काठमाडौँ गोर्खाजमाथि ८ विकेटको शानदार जित हासिल गर्दै लयमा फर्किएको संकेत दिएको छ ।
उता, पोखरा एभेन्जर्स भने यस प्रतियोगितामा आफ्नो पहिलो जितको खोजीमा रहेको छ । पोखराले आफ्नो पहिलो खेलमा सुदूरपश्चिम रोयल्ससँग ६ विकेटको हार व्यहोरेको थियो । आजको खेलमा पोखरा आफ्नो अघिल्लो हारलाई पछाडि पार्दै पहिलो अङ्क जोड्ने दाउमा हुनेछ भने जनकपुर लगातार दोस्रो जित निकाल्दै अंक तालिकामा आफ्नो स्थिति बलियो बनाउन चाहन्छ ।
