काठमाडौँ । सरकारले डायस्पोरामा रहेका नेपाली नागरिकहरूलाई लक्षित गर्दै प्रविधिमार्फत सेवा प्रवाहमा सुधार गर्ने नयाँ प्रयास सुरु गरेको छ ।
राहदानी, उद्धार र अन्य कन्सुलर सेवालाई झन्झटमुक्त बनाउन परराष्ट्र मन्त्रालयले ‘मोफा मित्र’ (MoFA Mitra) मोबाइल एप्लिकेसन सार्वजनिक गरेको हो । कन्सुलर सेवा विभागमा आयोजित एक विशेष समारोहका बीच परराष्ट्रमन्त्री शिशिर खनालले उक्त एपको औपचारिक उद्घाटन गर्नुभयो ।
नयाँ प्रविधिको प्रयोगसँगै अब विदेशमा बसोबास गरिरहेका नेपाली वा नेपालमा रहेका उनका परिवारका सदस्यहरूले सरकारी कार्यालयसम्म धाइराख्नुपर्ने बाध्यता हट्ने भएको छ । प्रयोगकर्ताहरूले यो एपमार्फत घरमै बसेर आफ्ना समस्या तथा गुनासाहरू दर्ता गर्न, अनलाइन आवेदन दिन र सम्बन्धित देशमा रहेका नेपाली दूतावास वा नियोगहरूसँग सोझै सम्पर्क स्थापित गर्न सक्नेछन् । कार्यक्रममा बोल्दै परराष्ट्रमन्त्री खनालले प्रवासमा रहेका नागरिकहरूको वास्तविक तथ्याङ्क अभावका कारण विगतमा उद्धार कार्य र राहत वितरणमा ठुलो चुनौती सामना गर्नुपरेको स्वीकार गर्नुभयो । यो समस्या समाधानका लागि विभिन्न सरकारी संयन्त्र, गन्तव्य मुलुक र नागरिकहरू स्वयंले प्रविष्ट गर्ने विवरणका आधारमा एकीकृत तथ्याङ्क सङ्कलनको काम समेत थालनी भइसकेको उहाँले प्रस्ट पार्नुभयो ।
विपद् वा संकटको समयमा विदेशमा रहेका नेपालीहरूले राज्य आफ्नो साथमै छ भन्ने बलियो ओत महसुस गरून् भन्ने उद्देश्यले ‘मोफा मित्र’ ल्याइएको मन्त्री खनालको भनाइ थियो । यसका साथै सरकारले ‘लिगल नेपाल कन्सुलर जीओभी एनपी’ नामक अत्याधुनिक अनलाइन प्रणालीलाई पनि सँगसँगै अगाडि बढाएको छ । यो डिजिटल प्रणाली हाल देशका सबै प्रदेश, जिल्ला प्रशासन कार्यालयहरू, वैदेशिक नियोगहरू र करिब ५०० वटा स्थानीय तहमा लागू भइसकेको छ ।
सरकारले चालू आर्थिक वर्षभित्रै देशका बाँकी रहेका सहित कुल ७ सय ५३ वटै स्थानीय तहमा यो डिजिटल कन्सुलर सेवा विस्तार गरिसक्ने लक्ष्य लिएको छ ।
