काठमाडौँ । प्रतिनिधि सभाको बैठकमा नेपाली काँग्रेसकी प्रमुख सचेतक बासना थापाले प्रधानमन्त्री बालेन्द्र शाहको सीमा सम्बन्धी हालैको अभिव्यक्तिप्रति कडा आपत्ति जनाउनुभएको छ ।
प्रधानमन्त्री शाहले आज (आइतबार) संसद्मा बोल्ने क्रममा नेपालले पनि भारतको भूमि मिचेको भनी दिएको बयानप्रति असन्तुष्टि जनाउँदै सांसद थापाले त्यसको स्पष्ट विवरण सार्वजनिक गर्न माग गर्नुभएको हो । सीमाजस्तो संवेदनशील विषयमा बिना तथ्य र प्रमाण बोल्न नहुने तर्क गर्दै उहाँले यदि प्रधानमन्त्रीको दाबी सत्य हो भने संसद्लाई जानकारी दिनुपर्ने, अन्यथा उक्त भनाइ संसद्को रेकर्डबाट हटाउनुपर्ने माग राख्नुभयो ।
यसअघि प्रतिनिधि सभामा सांसदहरूले सोधेका प्रश्नहरूको जवाफ दिने क्रममा प्रधानमन्त्री शाहले आफू सरकारको नेतृत्वमा आएपछि मात्र नेपालले पनि भारतीय भूमि मिचेको कुरा थाहा पाएको बताउनुभएको थियो । उहाँले लिपुलेकसहितका दुई देशबीच रहेका सबै सीमा विवादहरूलाई भारतसँगको कूटनीतिक छलफल र संवादका माध्यमबाट समाधान गरिने प्रतिबद्धता समेत व्यक्त गर्नुभएको थियो ।
प्रधानमन्त्रीको सोही अभिव्यक्तिले यतिबेला राजनीतिक वृत्तमा नयाँ तरंग र विवाद पैदा गरेको छ ।
