चितवन । बर्डफ्लु सङ्क्रमणका कारण गिरावट आएको अण्डाको मूल्य पुनः वृद्धि हुन थालेको छ ।
बर्डफ्लुका कारण उत्पादन घट्नु र पछिल्लो समय बजारमा माग बढ्नुले मूल्य उकासिएको हो । नेपाल लेयर्स कुखुरापालक संघका अनुसार ठूला फार्महरूको दरका आधारमा तय गरिएको नयाँ मूल्य आजैदेखि लागू भएको छ ।
नयाँ मूल्यसूची अनुसार ठूलो अण्डाको मूल्य प्रतिक्रेट ५० रुपैयाँले बढेर ५०० रुपैयाँ पुगेको छ भने मध्यम अण्डाको मूल्य ४७० रुपैयाँ र सानो अण्डाको मूल्य ४१५ रुपैयाँ तय गरिएको छ । संघका अध्यक्ष विनोद पोखरेलका अनुसार दैनिक ४५ लाख गोटा उत्पादन हुँदै आएको अण्डा बर्डफ्लुकै कारण घटेर २८ लाखमा सीमित भएको छ । जेठ अन्तिममा ५५० रुपैयाँमा बिक्री भइरहेको अण्डाको मूल्य घटेर ४५० रुपैयाँसम्म झरेको थियो ।
हाल अण्डाको लागत मूल्य प्रतिक्रेट ५७३ रुपैयाँ ६० पैसा (प्रतिगोटा १९ रुपैयाँ १२ पैसा) पर्ने भएकाले मूल्य बढे पनि किसानहरू अझै घाटामै रहेको र प्रभावित किसानका लागि राज्यले राहत उपलब्ध गराउनुपर्ने अध्यक्ष पोखरेलले बताए ।
