काठमाडौँ । उपल्लो सदनका विभिन्न सरोकारवाला निकायहरू आज आ-आफ्ना तोकिएका कार्यसूचीमा केन्द्रित भएर संवादमा जुट्दैछन् ।
राष्ट्रिय सभाअन्तर्गतका तीनवटा विषयगत समितिहरूको बैठक आज एकै दिन बस्न लागेको हो ।
जसमा दिउँसो साढे २ बजे आयोजना गरिने संघीयता सबलीकरण तथा राष्ट्रिय सरोकार समितिको छलफलमा देशको दक्षिणी सीमा क्षेत्रमा बसोबास गर्ने सर्वसाधारणको सुरक्षा अवस्थाबारे गहन समीक्षा गरिनेछ ।
यस्तै, बिहान ११ बजे विकास, आर्थिक मामिला तथा सुशासन समितिको बैठक डाकिएको छ । उक्त बैठकमा आगामी आर्थिक वर्ष २०८३/०८४ का लागि समितिको वार्षिक कार्ययोजना कसरी तयार पार्ने भन्ने विषयमा केन्द्रित रहेर छलफल हुनेछ ।
सोही समय अर्थात् बिहान ११ बजे नै विधायन व्यवस्थापन समितिको बैठक पनि बस्दैछ । यस बैठकमा समितिका गतिविधि तथा अभिमुखीकरण कार्यक्रम सञ्चालनका विषयमा विचार-विमर्श हुने जानकारी दिइएको छ ।
