काठमाडौँ । निर्वाचन आयोगमा प्रस्तावित प्रमुख आयुक्त र आयुक्तहरूका विरुद्ध दर्ता भएका उजुरी सदस्यहरूलाई बाँड्ने गरी संसदीय सुनुवाइ समितिको बैठक आज आयोजना गरिएको छ ।
समिति सचिवालयका अनुसार बिहान ११ बजे तय भएको बैठकमा प्रस्तावित पदाधिकारीहरूप्रति परेका उजुरीहरूबारे प्रारम्भिक छलफल गरी विवरण वितरण गर्ने मुख्य कार्यसूची छ ।
यसअघि असार २५ गते समितिले १० दिनको म्याद दिएर प्रस्तावित प्रमुख निर्वाचन आयुक्त मानबहादुर कार्की तथा आयुक्तहरू डा. राजीव सुब्बा र गुरु वाग्लेविरुद्ध उजुरी आह्वान गरेको थियो ।
असार १९ गते बसेको संवैधानिक परिषदको बैठकले प्रमुख निर्वाचन आयुक्तमा कार्की र आयुक्तमा सुब्बा तथा वाग्लेको नाम सिफारिस गरी सुनुवाइका लागि समितिमा पठाएको थियो ।
