काठमाडौँ । मुलुकभर मनसुनी वायु सक्रिय रहनुका साथै न्यून चापीय रेखा औसत स्थानमा अवस्थित रहेकाले अधिकांश भू-भागमा बदली र वर्षाको सम्भावना बढेको छ ।
जल तथा मौसम विज्ञान विभाग, मौसम पूर्वानुमान महाशाखाका अनुसार हाल देशका पहाडी तथा हिमाली भू-भागका साथै बागमती, गण्डकी, लुम्बिनी र सुदूरपश्चिम प्रदेशका तराई क्षेत्रमा साधारणतया बादल लागेको छ । मधेश र कोशी प्रदेशका तराई भेगमा आंशिक बदली रहेको छ । अहिले कर्णालीका केही स्थानका साथै कोशी, बागमती, गण्डकी, लुम्बिनी र सुदूरपश्चिम प्रदेशका थोरै स्थानमा मध्यमसम्मको वर्षा भइरहेको छ ।
आज दिउँसो देशभर साधारणतया बादल लाग्ने पूर्वानुमान गरिएको छ । हिमाली क्षेत्रका केही ठाउँ र पहाडी भू-भागका धेरैजसो स्थानमा मेघगर्जन र चट्याङ्गसहित मध्यमसम्मको वर्षा तथा हिमपातको सम्भावना छ ।
यस्तै, कोशी, बागमती, गण्डकी, लुम्बिनी र सुदूरपश्चिमका तराईका केही स्थान तथा मधेश प्रदेशका थोरै स्थानमा पनि वर्षाको सम्भावना रहेको छ । महाशाखाका अनुसार कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी क्षेत्रका एक-दुई स्थानमा भारी वर्षा हुन सक्नेछ ।
रातिको समयमा पनि देशभर साधारणतया बदली नै रहनेछ । कोशी, बागमती र गण्डकी प्रदेशका हिमाली क्षेत्रका केही स्थान तथा अन्य प्रदेशका हिमाली भू-भागका थोरै स्थानमा हल्कादेखि मध्यम वर्षा वा हिमपातको सम्भावना छ ।
त्यसैगरी, देशका पहाडी तथा तराईका विभिन्न भू-भागमा मेघगर्जन र चट्याङ्गसहित वर्षा हुनेछ । राति कोशी, बागमती र गण्डकी प्रदेशका पहाडी तथा तराई भू-भागका एक-दुई स्थानमा भारी वर्षाको जोखिम रहेकाले आवश्यक सतर्कता अपनाउन महाशाखाले आग्रह गरेको छ ।
