काठमाडौँ । सरकारले विद्युतीय एम्बुलेन्स र शव वाहनमा कर छुट दिने निर्णय गरेको छ ।
मन्त्रिपरिषद्को पछिल्लो बैठकले नेपालभित्र पैठारी वा उत्पादन हुने विद्युत्बाट चल्ने एम्बुलेन्स र शव वाहनमा लाग्दै आएको स्वच्छ पूर्वाधार लगानी शुल्क र मूल्य अभिवृद्धि कर (भ्याट) पूर्ण रूपमा छुट दिने निर्णय गरेको हो ।
सरकारका प्रवक्ता एवं शिक्षामन्त्री सस्मित पोखरेलका अनुसार मन्त्रिपरिषद्का मुख्य पाँच निर्णयहरू सार्वजनिक गरिएको छ । जसअन्तर्गत सुनसरी र सिराहामा भएका प्रदर्शनका क्रममा ज्यान गुमाएका चार जनालाई शहीद घोषणा गरिएको छ । शहीद घोषणा हुनेहरूमा सुनसरीका ओमप्रकाश मेहता, जयप्रकाश मेहता, रबिन्द्र कुमार मेहता र सिराहाका गणेश कुमार यादव रहेका छन् ।
यसैगरी बैठकले पोर्चुगल सरकारलाई काठमाडौँमा काउन्सिलर कार्यालय खोल्न स्वीकृति दिने निर्णय पनि गरेको छ । वैदेशिक रोजगार बोर्डको कार्यकारी निर्देशक पदमा बाराका निर्मल कुमार उप्रेतीलाई नियुक्त गर्ने निर्णय भएको छ ।
त्यस्तै पूर्व महालेखापरीक्षक टङ्कमणि शर्मा ढङ्गालको संयोजकत्वमा गठित एनसेलको सेयर खरिद-बिक्रीसम्बन्धी अध्ययन तथा छानबिन प्रतिवेदन २०८० लाई सार्वजनिक गर्ने निर्णय समेत मन्त्रिपरिषद्ले गरेको छ ।
