काठमाडौँ । राष्ट्रिय परिचयपत्रसम्बन्धी सम्पूर्ण सफ्टवेयर प्रणाली बिग्रिएपछि विगत एक महिनादेखि आवेदन सङ्कलनदेखि विवरण प्रमाणीकरणसम्मका सबै सेवा पूर्ण रूपमा ठप्प बनेका छन् ।
प्राविधिक समस्याका कारण नयाँ परिचयपत्र नम्बर लिन तथा राहदानीलगायतका अत्यावश्यक सेवा उपभोग गर्न पुगेका सेवाग्राहीले ठूलो सास्ती व्यहोर्नुपरेको छ ।
राष्ट्रिय परिचयपत्र तथा पञ्जीकरण विभागका निर्देशक नीराजन श्रेष्ठका अनुसार असार मध्यदेखि प्रणालीमा गम्भीर खराबी आएको हो । सरकारले राहदानी, सामाजिक सुरक्षा भत्ता, घरजग्गा किनबेच, बैङ्किङ तथा राजस्वजस्ता क्षेत्रमा राष्ट्रिय परिचयपत्र अनिवार्य गरेको छ । प्रणाली नै रोकिँदा वैदेशिक रोजगारी (ईपीएस) मा जान राहदानी बनाउनुपर्ने युवाहरू बढी प्रभावित भएका छन् । समस्या जटिल बनेपछि विभागले परिचयपत्रबिना नै सेवा प्रवाह गर्न विभिन्न निकायलाई परिपत्र गरेको छ भने राहदानी विभागमा छुट्टै डेस्क स्थापना गरी प्रमाणीकरण पत्र दिन थालिएको छ ।
यसअघि २०७५ सालमा फ्रान्सेली कम्पनी ‘आइडिमिया’ सँग सम्झौता गरी यो प्रणाली स्थापना गरिएको थियो । दुई वर्षअघि सम्झौता सकिएपछि छपाइ रोकिए पनि नेपाली प्राविधिकहरूले जेनतेन प्रणाली चलाएर नम्बर भने बाँडिरहेका थिए ।
तर, हाल सफ्टवेयर नै ठप्प भएपछि र कम्पनीसँगको सम्झौता समाप्त भइसकेकाले मर्मतसम्भारमा कठिनाइ उत्पन्न भएको छ । विभागले हालसम्म करिब ४० लाखलाई परिचयपत्र वितरण र दुई करोडभन्दा बढी नागरिकलाई परिचयपत्र नम्बर उपलब्ध गराइसकेको छ ।
