ललितपुर । महालक्ष्मी नगरपालिका–८ लुभुस्थित नरकट्टेमा नम्बर प्लेट नलिइएको ‘अन टेस्ट’ विद्युतीय हाइस अनियन्त्रित भई दुर्घटनामा परेको छ । दुर्घटनामा गाडी चालकसहित चार जना घाइते भएका छन् भने तीमध्ये दुई जनाको अवस्था चिन्ताजनक रहेको प्रहरीले जनाएको छ ।
गाडी एक्कासि नियन्त्रण बाहिर गएर स्थानीय एक घरको मूल ढोकामा ठोक्किन पुगेको थियो । त्यसलगत्तै गेटनजिकै पार्क गरी राखिएको बा १८ च ९२८८ नम्बरको कारसँग ठोक्किँदा कारमा सामान्य क्षति पुगेको छ ।
दुर्घटनामा परेर गाडी चालक महालक्ष्मी–८ लुभु निवासी २६ वर्षीय अखिल राजथला गम्भीर घाइते भएका छन् । उनको अहिले किस्ट अस्पतालमा उपचार भइरहेको छ । त्यसैगरी महालक्ष्मी–७ चागाथलीका २५ वर्षीय आशिष महर्जन पनि गम्भीर घाइते भएका छन् । महर्जनको बी एन्ड बी अस्पतालमा उपचार भइरहेको छ ।
त्यस्तै, मकवानपुर घर भई हाल महालक्ष्मी–६ सानागाउँ बस्दै आएकी १८ वर्षीया एलिसा लामा र महालक्ष्मी–८ का २६ वर्षीय राज महर्जन पनि घाइते भएका छन् । लामाको अवस्था मध्यम छ भने महर्जन सामान्य घाइते छन् । दुवै जनाको किस्ट अस्पतालमै उपचार भइरहेको छ ।
उक्त विद्युतीय हाइसमा चार जना मात्रै सवार रहेको र घटनाको विस्तृत विवरणका लागि थप अनुसन्धान भइरहेको प्रहरीले जनाएको छ ।
