काठमाडौँ । देशभरका टेलिफोन तथा इन्टरनेट सेवालाई अझ भरपर्दो र गुणस्तरीय बनाउनका लागि सरकारले पूर्वाधार विस्तार, नयाँ उपकरण थप तथा पावर ब्याकअप व्यवस्थापनलाई तीव्र गराएको छ ।
प्रतिनिधिसभाको बैठकमा सांसदहरूले उठाएका प्रश्नको जवाफ दिँदै सञ्चार तथा सूचना प्रविधिमन्त्री डा. विक्रम तिमिल्सिनाले चालु आर्थिक वर्षलाई मोबाइल सेवाको पहुँच विस्तार र गुणस्तर सुधारको ‘रूपान्तरण वर्ष’का रूपमा अघि बढाइने स्पष्ट पारे । यसै योजनाअन्तर्गत नेपाल टेलिकमका दुई सय नयाँ टावर निर्माणका लागि प्राप्त बोलपत्रहरू अहिले मूल्याङ्कनको चरणमा रहेको उनले जानकारी दिए ।
त्यसैगरी, मुलुकका १ हजार ५९७ विभिन्न स्थानमा फोरजी सेवा विस्तार गर्न आवश्यक पर्ने उपकरण खरिदका लागि यसै साताभित्र बोलपत्र आह्वान गरिने मन्त्री तिमिल्सिनाले बताए । विद्युत् आपूर्ति बन्द हुँदा समेत दूरसञ्चार सेवा प्रभावित नहोस् भन्नका खातिर टावरहरूमा ब्याट्री ब्याकअप क्षमता अभिवृद्धि भइरहेको छ । पछिल्लो तीन महिनाको अवधिमा सातै प्रदेशका ६ सयभन्दा बढी स्थानमा नयाँ ब्याट्री जडान भइसकेको र यसबाट विद्युत् जाँदा पनि ग्रामीण भेगमा ८ देखि १० घण्टा तथा सहरी क्षेत्रमा ४ देखि ६ घण्टासम्म सेवा निरन्तर चल्नेछ ।
यसैबिच, भोटेकोशीमा आएको भीषण बाढीका कारण नेपाल टेलिकमको मोबाइल, तारयुक्त र मुख्य प्रसारण प्रणालीमा ८ करोड ८५ लाख १२ हजार ६८५ रुपैयाँ बराबरको क्षति पुगेको मन्त्रीले संसद्लाई गराए । बाढीका कारण रसुवा, नुवाकोट र धादिङका १२० वटा साइटमध्ये ८३ वटामा सेवा अवरुद्ध भएको थियो ।
पूर्ण रूपमा नष्ट भएका तीनवटा साइटबाहेक बाँकी सबै ठाउँमा वैकल्पिक व्यवस्था गरेर सेवा पुनः सञ्चालनमा ल्याइसकिएको छ । रसुवाको टिमुरेमा हेलिकप्टरबाट सौर्य ऊर्जा प्रणाली पुर्याएर सेवा सञ्चालन गरिएको मन्त्री तिमिल्सिनाले जानकारी दिए । बाढीबाट क्षतिग्रस्त ६५.३ किलोमिटर फाइबर नेटवर्कमध्ये २७.४ किलोमिटर मर्मत भइसकेको छ भने टिमुरे र रसुवागढी क्षेत्रको मुख्य प्रसारण सेवालाई हाललाई माइक्रोवेभ प्रविधिमार्फत सञ्चालनमा ल्याइएको छ ।
