काठमाडौँ । जलवायु परिवर्तनको जोखिममा रहेका नेपाल र माल्दिभ्सले यसका असरविरुद्ध क्षेत्रीय तथा बहुपक्षीय मञ्चहरूमा सहकार्य गर्ने प्रतिबद्धता जनाएका छन् ।
सोमबार दिउँसो भएको टेलिफोन संवादका क्रममा माल्दिभ्सका विदेशमन्त्री इरुथिशाम आदमले परराष्ट्रमन्त्री शिशिर खनाललाई सम्पर्क गर्दै दुःखको यस परिस्थितिमा नेपाल सरकार र नेपाली जनताप्रति गहिरो समवेदना व्यक्त गरिन् । कुराकानीका क्रममा उनले माल्दिभ्स सरकार तथा त्यहाँका जनताको तर्फबाट पूर्ण ऐक्यबद्धता प्रकट गरेकी हुन् ।
माल्दिभ्सले देखाएको यो ऐक्यबद्धता र सहयोगप्रति परराष्ट्रमन्त्री खनालले गहिरो आभार व्यक्त गरे । छलफलका क्रममा दुवै मन्त्रीले जलवायु परिवर्तनका कारण साना र जोखिममा रहेका राष्ट्रहरूले भोग्नुपरेका साझा समस्याबारे विचार-विमर्श गरेका थिए ।
परराष्ट्र मन्त्रालयका अनुसार दुवै नेताहरूले जलवायु न्यायको पक्षमा अन्तर्राष्ट्रिय मञ्चमा आवाज उठाउन र सामूहिक पहललाई तीव्रता दिन सहमति जनाएका छन् ।
