काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने र नेपालका लागि चिनियाँ राजदूत माओमिङबीच भोटेकोशी बाढीपछि उत्पन्न परिस्थितिबारे छलफल भएको छ ।
मंगलबार लामिछानेको बुढानीलकण्ठस्थित निवासमा पुगेर राजदूत माओमिङले बाढीका कारण पुगेको जनधनको क्षतिप्रति गहिरो दुःख व्यक्त गरे । त्यसक्रममा उनले विपद्को यो कठिन समयमा चीन नेपाललाई जुनसुकै प्रकारको सहयोग गर्न तयार रहेको स्पष्ट पारे । उद्धार, राहत तथा पुनर्निर्माणको प्रक्रियामा चीन नेपालको साथमा रहने प्रतिबद्धता उनले जनाएका छन् ।
विपद्लगत्तै चीनले नेपालमा उद्धारकर्मी र डीएनए विशेषज्ञसहितको टोली खटाएको स्मरण गराउँदै राजदूत माओमिङले आवश्यकता रहेसम्म सहयोग निरन्तर रहने जानकारी दिए ।
भेटमा रास्वपा सभापति लामिछानेले नेपाल संकटमा पर्दा चीनले गर्दै आएको सहयोगका लागि आभार प्रकट गरे । उनले आगामी दिनमा बाढीपहिरोजस्ता विपद्को क्षति न्यूनीकरण गर्न पूर्वसूचना प्रणालीलाई थप सुदृढ र प्रभावकारी बनाउनुपर्नेमा जोड दिँदै दुई देशबीच अझ बलियो समन्वयको प्रस्ताव राखेका थिए ।
लामिछानेको प्रस्तावमा सहमति जनाउँदै राजदूत माओमिङले विपद् पूर्वसूचना प्रणालीलाई प्रविधिमैत्री र प्रभावकारी बनाउन चीन प्रतिबद्ध रहेको बताए ।
