काठमाडौँ । नेपाल राष्ट्र बैंकले हालै सार्वजनिक गरेको तथ्यांक अनुसार आर्थिक वर्ष २०८२/८३ को चौथो त्रैमासमा घरजग्गा कारोबारमा ठूलो सुधार आएको छ ।
अघिल्लो वर्षको सोही अवधिको तुलनामा कुल कारोबार संख्या १२.२५ प्रतिशत र राजीनामा कारोबार २२.८८ प्रतिशतले बढेको हो । समीक्षा अवधिमा घरजग्गा किनबेच भएको क्षेत्रफल १५.४१ प्रतिशतले वृद्धि भएको छ, जबकि अघिल्लो वर्ष यस्तो क्षेत्रफल २.९८ प्रतिशतले घटेको थियो ।
चौथो त्रैमासमा मात्रै कुल २ खर्ब ७५ अर्ब ७३ करोड रुपैयाँको घरजग्गा कारोबार भएको छ, जसका कारण समग्र आर्थिक वर्षको कारोबार रकम ७ खर्ब २० अर्ब ८६ करोड रुपैयाँ पुगेको छ । बजारमा कारोबार बढेसँगै सरकारी राजस्व ४८.२६ प्रतिशत र पुँजीगत लाभकर ६३.२२ प्रतिशतले वृद्धि भएको छ भने बैंक तथा वित्तीय संस्थाबाट घरजग्गामा जाने कर्जा पनि ६.९३ प्रतिशतले बढेको छ ।
भौगोलिक आधारमा विश्लेषण गर्दा बागमती प्रदेशमा घरजग्गा बजार सबैभन्दा धेरै चलायमान देखिएको छ । बागमतीमा राजीनामा कारोबार ६९.३८ प्रतिशत, क्षेत्रफल ५०.२४ प्रतिशत र कारोबार रकम १७५.३३ प्रतिशतले बढेको छ ।
उता मधेश प्रदेशमा भने कारोबार संख्या ३.४४ प्रतिशत र क्षेत्रफल ६.१९ प्रतिशतले घटेको छ । महानगरपालिकाहरूमध्ये काठमाडौँमा १५५.७४ प्रतिशत, ललितपुरमा १३६.९२ प्रतिशत र पोखरामा १०८.७१ प्रतिशतले कारोबार संख्या बढेको छ भने उपमहानगरतर्फ हेटौँडामा कारोबार रकम १८६.८० प्रतिशतले वृद्धि भएको छ ।
समग्रमा पछिल्लो समय घरजग्गाको किनबेच, वित्तीय प्रवाह र सरकारी राजस्व तीनै सूचकमा उत्साहजनक सुधार आएको छ ।
