काठमाडौँ । नेपाली कांग्रेसले आगामी १५औँ महाधिवेशनका लागि तल्लो तहदेखि केन्द्रीय तहसम्मका विभिन्न पदमा प्रतिस्पर्धा गर्न चाहने उम्मेदवारहरूका निम्ति मनोनयन शुल्क सार्वजनिक गरेको छ ।
नयाँ निर्वाचन निर्देशिका बमोजिम पार्टीको असोज ३ र ४ गते वडास्तरबाट प्रारम्भ हुने अधिवेशन प्रक्रिया असोज १६ देखि १९ गतेसम्म काठमाडौँमा हुने केन्द्रीय महाधिवेशनसम्म सञ्चालन हुनेछ । उक्त तालिका अनुसार शीर्ष पद मानिने केन्द्रीय सभापतिका लागि उम्मेदवारी दिन रु ४० हजार दस्तुर तोकिएको छ । यस्तै उपसभापति र महामन्त्री पदका आकांक्षीले रु ३० हजार, सहमहामन्त्रीले रु २० हजार तथा केन्द्रीय सदस्य पदका लागि रु ११ हजार शुल्क बुझाउनुपर्नेछ ।
प्रदेशस्तरको नेतृत्वका लागि सभापतिले रु २० हजार, उपसभापति र महामन्त्रीले रु १५ हजार, सहमहामन्त्रीले रु १० हजार र सदस्यले रु ५ हजार निर्धारण गरिएको छ । जिल्लातर्फ सभापतिलाई रु १५ हजार, उपसभापति तथा सचिवलाई रु ७ हजार, सहसचिवलाई रु ६ हजार र सदस्यका लागि रु ३ हजार शुल्क तय भएको छ ।
त्यस्तै प्रतिनिधिसभा क्षेत्रीय सभापतिले रु १० हजार, उपसभापति/सचिवले रु ५ हजार, सहसचिवले रु ४ हजार र सदस्यले रु २ हजार बुझाउनुपर्नेछ । प्रदेश सभा क्षेत्रतर्फ सभापतिलाई रु ७ हजार, उपसभापति/सचिवलाई रु ४ हजार, सहसचिवलाई रु ३ हजार र सदस्यलाई रु २ हजार तोकिएको छ ।
स्थानीय तह अन्तर्गत महानगर र उपमहानगर सभापतिका लागि रु ७ हजार, उपसभापति/सचिवका लागि रु ४ हजार, सहसचिवका लागि रु ३ हजार र सदस्यका लागि रु २ हजार शुल्क राखिएको छ ।
नगरपालिका सभापतिलाई रु ५ हजार, उपसभापति/सचिवका लागि रु ३ हजार, सहसचिवका लागि रु २ हजार र सदस्यलाई रु १ हजार निर्धारण गरिएको छ ।
गाउँपालिका सभापतिका लागि रु ५ हजार, उपसभापति/सचिवका लागि रु २ हजार, सहसचिवका लागि रु १,५०० र सदस्यका लागि रु १ हजार दस्तुर तोकिएको छ । प्रारम्भिक वडा तहमा भने सभापतिले रु १ हजार, उपसभापति, सचिव र सहसचिवले रु ७ सय तथा सदस्य र क्षेत्रीय प्रतिनिधिले रु ५ सय उम्मेदवारी दस्तुर बुझाउनुपर्ने प्रावधान छ ।
