काठमाडौँ । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा सम्पन्न फाइनल भिडन्तमा कर्णाली शिवराजलाई स्तब्ध पार्दै अन्नपूर्ण स्पाइकर्स किंगले नेपाल भलिबल लिग (एनभीएल) को उद्घाटन संस्करणको ट्रफी उचालेको छ ।
उपाधि होडमा अन्नपूर्णले कर्णालीमाथि पूर्ण दबदबा कायम राख्दै लगातार तीन सेटको सोझो जित निकालेको हो । प्रतिस्पर्धाको पहिलो सेट २५-१५ ले आफ्नो पक्षमा पारेको अन्नपूर्णले दोस्रो सेट २५-२० र तेस्रो सेट २५-१८ ले जित्दै उपाधि पक्का गर्यो ।
केडिया समूहको आयोजनामा सञ्चालन भएको यस प्रतियोगितामा कुल ६ वटा टोलीले प्रतिस्पर्धा गरेका थिए । नेपाली पुरुष भलिबलको इतिहासमै पहिलोपटक आयोजना गरिएको यो फ्रेन्चाइज लिगको विजेता बनेसँगै अन्नपूर्णले २० लाख रुपैयाँ नगद पुरस्कार हात पारेको छ ।
यो रकम घरेलु भलिबल प्रतियोगितामा प्रदान गरिएको अहिलेसम्मकै सबैभन्दा ठूलो पुरस्कार राशि हो ।
